Fiyos de Nicer

Un ÚNICO conceyo cúa toponímia amañada (El Franco, 21/04/2005), pero SIN efectos prácticos, y con manifesto y voluntarioso incumprimento: NUN se respeta nel BOPA, INCÚMPRESE na WEB del propio Conceyo, INÓRASE nel SITPA, NUN s'amañan os lletreiros das carreteras....

Y por si esto fora pouca risión xa, TODA a información complementaria d'este mesmo mapa que temos escaniao en riba ven MAL, sin respetar a propia toponimia que poin "ellos mesmos" nel mapa de carreteras.

¡¡¡ PATÉTICO !!!

Son INCAPACES de cumprir as súas propia promesas, son INCAPACES de cumprir as súas propias decisiois del sou propio Conseyo de Goberno, son INCAPACES de cumprir el sou propio BOPA, y hasta son INCAPACES de COPIAR lo que tein escrito na foya anterior.

A "CONGRUENCIA y COHERENCIA" del mapa de carreteras é outro trabayo del Goberno del Principao d'Asturias (PSOE+IU), PUBLIDISA (diseño y xestión editorial) y Gráficas EUJOA (imprenta).

Conceyos cúa toponimia amañada al 17/10/2006:
Carreño, El Franco, Llanes, Gozón, Llangréu, L.lena, Villaviciosa, Sariegu, Bimenes, Cabranes, Nava y Xixón

VA PIDIR UNA REUNIÓN COLA FSA PA TRATAR LES EMISIONES N'ASTURIANU DE LA RTPA Volver a portada

Jesús Iglesias da ocho meses pa desarrollar el Plan de Normalización del asturianu

El dirixente d'Izquiertda Xunida - Bloque por Asturies Jesús Iglesias condenó esta mañana l'incumplimientu del Plan de Normalización del asturianu por parte del Gobiernu asturianu. El que va ser candidatu por IX nes elecciones del 2007 afirmó que falten por cumplise mas del 50% de les midies recoyíes nesti documentu, conseñando como especialmente graves los incumplimientos en materia de dignificación del profesoráu d'asturianu, aplicación de la revisión toponímica y medios de comunicación. Iglesias, qu'acusó al PSOE de tener una "Visión enquivocada" del asturianu al identificalu como "un problema" y al poner enzancos nel camín de la so normalización. El secretariu xeneral d'IX dio anuncia de que diba pidir una reunión cola FSA pa tratar el tema de la presencia del asturianu nes emisiones de la RTPA y dio un plazu d'ocho meses, d'equí a mayu, mes de les elecciones, pa que se lleven alantre tolos puntos del Plan de Normalización.

A nivel local, los representantes d'IX-BA nel conceyu de Xixón, Jesús Montes Estrada y Carmen Rúa ficieron tamién güei declaraciones asemeyaes en que denuncien la falta de compromisu por parte de los sos socios de gobiernu pa desarrollar una política de normalización llingüística medianamente cusriosa. Montes Estrada faló de la "fobia" al asturianu de bien de sectores del PSOE, mientres que Carmen Rúa acusó a los socialistes d'esparder la falsa idea de la obligatoriedá.

ASTURIES.COM, 11/10/2006
http://www.asturies.com/noticia.php?cod=26566

Aprobáu l’espediente toponímicu de Nava

A pesar de que la nota que puntualmente s'unvia dende Conseyería de Presidencia informando de los alcuerdos tomaos en Conseyu de Gobiernu, y en base a la qu'Asturies.com ellaboró la noticia qu'ofrecia ayeri esti mediu sobre la sesión del órganu oficial, nun facía referencia a l'aprobación d'espediente toponimicu nengún, fontes oficiales confirmaron a Asturies.com l'aprobación ayeri del espediente del conceyu de Nava. Esta omisión na información oficial causó estrañeza en fontes oficiales consultaes por esti mediu.

Según estes fontes oficiales del Conseyu de Gobiernu, la reunión de Conseyu de Gobiernu que se celebró ayeri en conceyu de Teberga sí aprobó l'espediente toponímicu de Nava, anque dende Presidencia unviose una nota, que nun tuvo amestadures nin rectificaciones posteriores, y na que nun se fai mención al espediente que recupera y oficializa los nomes tradicionales del conceyu de Nava desbloquiando'l procesu de recuperación de topónimos dempués de más d'ocho meses d'allancamientu. Les mesmes fontes apuntaron a esti mediu que, en pasando'l periodu vacacional, el Conseyu de Gobiernu va volver al trabayu en setiembre col compromisu de siguir aprobando espedientes toponímicos a un ritmu cuasi semanal. El primeru que ta en llista d'espera pal mes qu'entra ye'l de Xixón.

El Conseyeru de Rellaciones Esteriores y Seguridá Javier Valledor, ún de los asistentes a la reunión del Conseyu de Gobiernu, comentó a Asturies.com que la omisión de l'aprobación del espediente toponímicu navetu podría debese a que l'asuntu entró fuera del orde del día. Valledor esplicó tamién que'l desbloquéu del procesu de recuperación toponímica foi ún de los alcuerdos a los que se llegó'l mes pasáu na última valoración del pautu de Gobiernu, un alcuerdu al que Valledor reconoció que "foi difícil llegar". Pela so parte, Rafael Palacios, representante de Bloque por Asturies, congracióse de que por fin se desbloquiare'l procesu de recuperación toponímica y de qu'entamare a cumplise, anque yá sobre'l tiempu, los alcuerdos políticos a los que se llegare al respective.

ASTURIES.COM, 04/08/2006
http://www.asturies.com/noticia.php?cod=26227

DEMPUÉS DE 6 MESES ENSIN QUE S'APROBARE ESPEDIENTE NENGÚN

IX-BA pide nuna proposición non de llei a la Xunta Xeneral "que se recupere’l ritmu d’oficialización de topónimos"

El Grupu Parlamentariu d'Izquierda Xunida - Bloque por Asturies presentó esta mañana en Rexistru de la Xunta Xeneral del Principáu una proposición non de llei na que "encamienta al Conseyu de Gobiernu a recuperar el ritmu normal nel procesu d'aprobación de Decretos d'oficialización toponímica, dando cumplimientu a les peticiones de los conceyos involucraos nel procesu y entainando cola aprobación de los espedientes pendientes".

Na esposición de motivos, IX-BA sorraya que n'actualidá hai un total de 46 conceyos que-y solicitaron a la Xunta asesora de toponimia entamar el so espediente de recuperación toponímica, de los que 10 yá recibieron l'aprobación, pero recuerda que l'últimu en recibila foi con fecha del 17 de payares del 2005, tando 17 espedientes más yá col preste de los sos respectivos conceyos y pendientes namás del trámite en Conseyu de Gobiernu, polo qu'IX presenta la proposición non de llei "en cumplimientu de les acciones previstes nel plan de normalización del asturianu".

La Proposición non de llei d'IX-BA vien dempués de qu'ayeri se celebrare una sesión más del Conseyu de Gobiernu na que nun se trató nengún espediente toponímicu, ello nuna institución na que participen los conseyeros d'IX-BA como parte del gobiernu asturianu y tres de seyes meses ensin aprobación d'espediente nengún, un retrasu que nun tien esplicación oficial. D'otra manera, IX-BA presenta la proposición nún de los momentos más difíciles de la so rellación cola FSA-PSOE a lo llargo de la llexislatura a cuenta del casu del repartu de cargos de la Procuradoría Xeneral.

ASTURIES.COM, 16/06/2006
http://www.asturies.com/noticia.php?cod=25993

El Franco cellebra les I Xornadas de Toponimia del Eo-Navia

La entrada a estes xornaes ye llibre

El Conceyu d'El Franco, en collaboración cola Conseyería de Cultura, Comunicación Social y Turismu del Principáu d'Asturies, va cellebrar ente los díes 19 y 20 de mayu les I Xornadas de Toponimia del Eo-Navia cola fin d'allegar esti procesu de recuperación y oficialización a los vecinos de la zona.

Repartíes en dos sesiones que se van cellebrar el vienres 19 de mayu a les cinco y media la tarde y el sábadu 29 de mayu a les once la mañana, nel Salón de Sesiones del Conceyu d'El Franco, les xornaes que lleven por nome «Os nomes dos nosos sitos» van desplicar al traviés de conferencies, meses redondes y coloquios el sentíu que tien y na forma na que se fai la recuperación y oficialización de los nomes de llugar tradicionales.

Les comunicaciones de les xornaes son les siguientes:

Vienres 19 de mayu:

5:30 Presentación de les I Xornadas de Toponimia "Os nomes dos nosos sitos"

6:00 Conferencia de Ramón d’Andres, Xefe de la Oficina de Política Llingüística del Principáu: "A recuperación dos nomes dos sitos y a Xunta de Toponima del Principao"

7:00 Comunicación de María Luisa López Diz, filóloga experta en toponimia: "Como se recoyeron os nomes dos sitos de Grandas de Salime"

7:20 Comunicación de Xesús Pacios, expertu na cultura popular d’Ibias: "A toponimia del conceyo d’Ibias"

7:40 Comunicación de José Manuel Pérez Fernández, xurista, profesor na Universidá d’Uvieu: "A oficialización da toponimia y os sous efectos xurídicos"

8:00 Mesa Redonda: "Os conceyos y a recuperación dos nomes tradicionales dos sitos" Cola participación de los Alcaldes o representantes de los conceyos del Eo-Navia comprometíos col procesu d’oficialización de la toponimia.

Sábadu 20 de mayu

11:00 Conferencia de Xosé Miguel Suárez , filólogu, historiador y expertu na toponimia del Eo-Navia: "A toponimia del Eo-Navia: el sou uso popular y a súa recuperación"

12:00 Comunicación de Fernando Álvarez-Balbuena, filólogu y miembru de la Xunta Asesora de Toponimia del Principáu: "Como se recoyen os nomes tradicionales dos sitos"

12:20 Comunicación de Fredo de Carbexe, xeógrafu y expertu en desarrollu local: "Toponimia, identidá cultural y desarrollo rural".

13:00 Mesa redonda, cola participación de representantes d’Asociaciones Culturales: "A recuperación dos nomes dos nosos sitos y a súa aceptación social"

ASTURNEWS.COM, 14/05/2006
http://www.asturnews.com/index.php?idn=2913

Grandas de Salime, Tapia, Vegadeo y Pezós arreglen la so toponimia

El prósimu día 19 van tener llugar unes xornaes dedicaes a la toponimia de la zona

Redacción
La Xunta Asesora de Toponimia trabaya sobre l'occidente asturianu, depués de que los conceyos de Grandas de Salime, Tapia, Vegadeo y Pezós solicitaren a la Conseyería de Cultura del Principáu la oficialización de la so toponimia, teniendo yá'l primeru d'ellos aprobáu l'espediente de revisión nel Plenu del Ayuntamientu. A estes iniciatives de los conceyos van sumase una xornaes organizaes pola Consyería de Cultura que se van facer el prósimu día 19 n'El Franco sobre toponimia, a les que van asistir varios alcaldes de la zona pa conocer el procesu d'oficialización.

Per otra parte, la Conseyería de Cultura tien previsto programar a lo llargo de la seronda un cursu d'alfabetización na fala empobináu a funcionarios municipales y periodistes.

ASTURNEWS, 10/05/2006
http://www.asturnews.com/index.php?idn=2901

PARTE CLAVE DE LA POLÍTICA LLINGÜÍSTICA NA LLEXISLATURA Volver a portada

Un añu dende l’aprobación de los primeros topónimos

El 21 d'abril del 2005 el Conseyu de Gobiernu del Principáu d'Asturies dió-yos el preste a los trés primeros espedientes toponímicos que recuperaben con calter llegal, los nomes tradicionales de los conceyos de Carreño, el Franco y Llanes. Nun día qu'abría esperances nel procesu de dignificación de la toponimia asturiana, la conseyera Ana Rosa Migoya declaraba que l'aprobación de los espedientes toponímicos suponía "un pasu importante nel cumplimientu del pautu de gobiernu y na normalización del asturianu" mientres que'l Director de la Oficina de Política Llingüística Ramón d'Andrés vía nello "un fechu históricu ensin precedentes" y una gran alegría personal "al ver convertise en realidá un anhelu de va tiempu".

Aquel mesmu día, Ramón d'Andrés adelantaba que la siguiente tanda d'espedientes toponímicos podría pasar per Conseyu de Gobiernu enantes del mes de xunu d'aquel añu 2005, pero l'optimismu del responsable de Política Llingüística topó con una realidá burocrática testerona, y los siguientes espedientes en vese declaraos oficiales, que correspondíen a los conceyos de Gozón, L.lena y Llangréu, tuvieron d'esperar a mediaos del mes de xunetu. Cuatro meses más foi preciso esperar pa que la toponimia asturiana volviere a apaecer pelos discutinios del Conseyu de Gobiernu, hasta que'l 17 de payares del 2005 pasaron a trámite los espedientes de Sariegu, Cabranes, Villaviciosa y Bimenes.

D'entós p'acá, el Conseyu de Gobiernu yá nun aprobó más espedientes toponímicos, y nun ta claro cuando podríen dase de pasu los siguientes. La llista de conceyos que tienen yá reconocíos oficialmente pol Gobiernu asturianu los sos nomes de llugar tradicionales, llibres de deformaciones y procesos de castellanización, llega a los 10, pero va yá 5 meses que nengún espediente pasa peles xuntes que'l Gobiernu asturianu suel celebrar toles selmanes na so sede uvieina na cai Suarez de la Riva.

El parón del procesu de recuperación toponímica na máxima instancia del executivu autonómicu, pal que naide paez tener una esplicación, nun quier dicir que la Xunta de Toponimia, organismu que s'encarga d'ellaborar los espedientes toponímicos, tea allancada, y de fechu, güei mesmo tien una sesión de trabayu en conceyu de Caravia. Tampoco pue falase de qu'exista un parón al nivel de l'alministración local, y de fechu conceyos asturianos de la importancia de Siero o Xixón tan collaborando activamente cola Xunta de Toponimia na recuperación de los sos topónimos. L'enfotu de los conceyos na cuestión resulta tan claru qu'hai incluso conceyos como'l d'Ayer, qu'aprobaron a nivel local el so espediente, que tan adelantándose al determín del executivu asturianu, entamando pela so cuenta la rotulación de carreteres y llugares con unos topónimos que nun son oficiales dafechu.

En cualquier casu, los espedientes de conceyos yá terminaos y col preste previu de los mesmos Ayuntamientos van apinándose énte la puerta del Gobiernu asturianu y lleguen yá a la cifra de 11, correspondientes a Nava, Ayer, La Ribera, Llaviana, Colunga, Morcín, Riosa, Pezós, Grandas de Salime y Samartín del Rei Aurelio, a los qu'hai d'amestar el de Xixón, aprobáu apocayá col votu unánime de tola corporación del que ye'l conceyu con más habitantes d'Asturies. Toos tienen enriba l'interrogante de la so fecha d'aprobación definitiva.

ASTURIES.COM, 21/04/2006
http://www.asturies.com/noticia.php?cod=25641

Izquierda Asturiana denuncia'l 'secuestru' de la toponimia per parte del gobiernu del Principáu

Izquierda Asturiana tacha de "patétitu" el papel d'IX-BA nel gobiernu asturiana no tocante a la materia llingüística y, concretamente, na toponimia del país

El portavoz nacional d'Izquierda Asturiana, Ignaciu Llope, denuncia'l 'secuestru' per parte del gobiernu del Principáu de nueve expedientes toponímicos asina como la falta d'usu de los que yá foron aprobaos. Pal representante de la organización d'izquierda, pesie a que los conceyos aprueben la toponimia asturiana ésta ye "retenida de forma inxustificada y aplazada" la so aprobación "sine die", lo que fue calificao por Llope como "intolerable y una total tomadura de pelo". IAS esixe d'esta manera l'aprobación inmediata d'esos expedientes así como l'usu de los que yá son oficiales.

Según el portavoz d'IAS, "pesie a qu'estos 9 ayuntamientos (Ayer, Colunga, Llaviana, Morcín, Nava, Pezós, La Ribera, Riosa y Samartín del Rei Aurelio) aprobaron, na mayor parte los casos por unanimidá y hai meses, la solicitú de que s'oficialicen los nomes asturianos de los pueblos y llugares, el gobiernu asturianu, dende l'iniciu del procesu ta faciendo un llabor de dilación pa evitar que se lleve a efectu la oficialización rial d'esos nomes". Pa Llope "el PSOE ta sorprendíu del grau d'aceptación que la nuestra toponimia ta teniendo inclusive nos cuadros locales de les sos propies files", poro ta tratando de frenar esti procesu per vía alministrativa.

Ignaciu Llope añedió que la prueba d'esta falta de voluntá ye que los topónimos de los conceyos aprobaos en Conseyu de Gobiernu nin siquier se tan usando nes publicaciones oficiales.

Tocante al papel d'IX-BA nel talu gobiernu, el portavoz d'IAS señaló que "ye tan patéticu que nun merez calificación, yá que l'actitú del PSOE básase en rise a la cara del so sociu y nun cumplir los sos compromisos, a sabiendes de que la capacidá d'aguante d'IX-BA énte los desplantes y insultos del PSOE ye directamente proporcional al amor qu'aquellos tienen a los sos puestos y cargos nel Gobiernu".

ASTURNEWS, 20/04/2006
http://www.asturnews.com/index.php?idn=2817

Por: FdN | Documentación | Comentarios (0) | Referencias (0)
Llido: 349 veces